حكم العزيز يكفيك

سهرت طولِ الّليل
أحكي وَفَكّرْ فيكْ

أربعْ سنينِ اتْقَضُوا
لا حدّ حاسِسْ بيكْ

مين اللي قتلِكْ يا بلدْ
بِرْصاصه جُوَّا عِنِيكْ

حطّم رؤوسِ الأملْ
جاثمْ بِرِجْلُه عليكْ

إوْعي يِكُونْ عفريتْ
مِنْ كَوْكَبِ المكسيكْ

قَتِّلْ وِلَادْنَا وِهَرَبْ
يِلْعَبْ مع الشّكاشيكْ

والجُرْم سِمّاوي
من ماركة التّسليكْ

ولّع كدا في دارنا
بالطّمسِ والتّشْكيكْ

خَلّى الأدله اتْمَحَتْ
قام فتّحِ الشّبَابِيكْ

طارت مع فلوسنا
صَاحْ دقّتِ المزازيكْ

حسره عليكِ يا بلدْ
دا الدّيب بِيرْتَعْ فيكْ

يعوي في كل مكانْ
حتى في بيت الدّيكْ

خايفْ في يوم نلقاهْ
يطلبْ عِوَضْ وِفْرِيكْ

حكم البراءه وصلْ
وكفايه حزن عليكْ

حكم البشر عالبشرْ
فيه العجبْ يِبْكِيكْ

صَبْرا يا أمّ البطلْ
حُكْمِ العزيزْ يِكْفِيكْ

بقلم / عبدالعزيز المنسوب